Los 96 refuxaos afganos acoyíos n'Asturies tán "bien" anque nuna fase de "shock"

Los menores n'edá escolar sedrán escolarizaos "darréu"

Los 96 refuxaos afganos acoyó nel Principáu tán "bien", anque tán nuna fase de "shock por mor de que tuvieron que salir a la desesperada del so país", según dixo güei la delegada del Gobiernu n’Asturies, Delia Losa.

Losa dio estos datos por mor de la xunta celebrada esta mañana con Cruz Roja y Accem, les dos organizaciones non gubernamentales que se tán encargando de la recepción y acoyimientu de los refuxaos afganos.

Na xunta, la titular de la Delegación del Gobiernu foi informada sobre cómo se ta desendolcando’l programa d’acoyida, y aprovechó p’agradecer el "gran llabor" que lleven alantre les dos entidaes, que "faen de ponte" con "axilidá" ente l’Alministración y les situaciones de necesidá que se producen.

Según apuntó Losa, los refuxaos n’edá escolar que tán nel Principáu sedrán escolarizaos "darréu" y el serviciu públicu de salú "yá ta llevando alantre’l control sanitariu de toos".

Losa apuntó que de mano nun piensen na llegada de más refuxaos a Asturies, anque dixo qu’España sigue trabayando colos organismos internacionales na "posibilidá de siguir acoyendo o sacando d’Afganistán a les persones que lo necesiten" y que se redistribuirán "en función de les persones que lleguen y de la capacidá de les comunidaes autónomes".